पुनपुन तीर(मगही कविता)

पुनपुन तीर(मगही कविता)

पुनपुन तीर कनइया ग्राम ।

जनकदेव बाबू हल नाम ।।

पत्नी हथ चनपूरा चाची ।

बैना बाँटथ खाँची-खाँची ।।

तीनों लइकन बड़ी सपूत ।

अइसन मेल अजब अजगूत ।।

समय सभे के बड़ी सतयलक ।

आखिर दुख किनारा धयलक ।।

बड़का बेटा राम अनुज ।

के न साथी ? देव - दनुज !

मंझिला बेटा नाम रमेश ।

माथा के सब उड़ गेल केश ।।

छोटका बेटा लछुमन-भरथ ।

दुनों भाई के सेवा करथ ।।

डोरमा कोंड़रा चउँरी वाली ।

रखलन घर के मुँह के लाली ।।

छत्तिस बिगहा उनका खेत ।

समय के साथे चललन चेत ।।

राम अनुज तो बुद्धिमान ।

कहबS हथ आदर्श किसान ।

आलू सरसो पैदावार ।

धान भी उपजे नदी किनार ।।

मंझिला बड़ी महान कहाबथ ।

लोकाचारी खूब निभाबथ ।।

छोटका सबदिन बाहरे रहे ।

भाई से भर मुँह बात न कहे ।।

उनके हीं के तेसर पीढ़ी ।

आसमान में लगबइत सींढ़ी ।। 

दूगो पोता आई• आई• टी• ।

सभे सहारा ऑलमाइटी ।।

दू पोता सैनिक स्कूल ।

सभ्भे हथ विद्या के मूल ।।

एगो  ललुआ पढ़ल न ओतना ।

घर गृहस्थी खेतो जोतना ।।

पोतिन सब लक्ष्मी-सरसती ।

रखथी सबके माँ भगवती ।।

मेल-जोल से सब परिवार ।

दे हथ दिन आउ रात गुजार ।।

पक्का बं-बं बनल मकान ।

किरपा करथ सदा भगवान

______________

लेखक तो हम बन न पइली ।

मगही में ई कविता कइली ।।

कइसन लगलो न हम जानी ।

बाकी हे ई सच्च कहानी ।।

कवि चितरंजन 'चैनपुरा' , जहानाबाद, बिहार, 804425

दिव्य रश्मि केवल समाचार पोर्टल ही नहीं समाज का दर्पण है |