सोन किनारे खरसा गाँव

सोन किनारे खरसा गाँव

सोन किनारे खरसा गाँव ।

घना बगइचा छयले छाँव ।

कउआ कयले काँव-काँव ।

करइत चिरइंयन चाँव-चाँव ।।

खेलित-कूदित लइकन साथ ।

रस्सी-पगहा लेले हाथ ।।

सुंदर दृश्य बड़ी रमणीक ।

ऊ हे अरबल के नजदीक ।।

उहे गाँव में संजय बाबू ।

देख के होबे दिल बेकाबू ।।

दिल के राजा साफ ऊ मन के ।

घर में ढेर लगल है धन के ।।

खेती खूब करS हथ जम के ।

हियो सुनाबित सुनिहS थम के ।

अब तो रहथ जहानाबाद ।

मेहनत से दुनिया आबाद ।।

पढ़ल-लिखल सज्जन संभ्रांत ।

के न जाने जिला आउ प्रांत ।।

सादा जीवन उच्च विचार ।

मगही से मइया सम प्यार ।।

बेटा हे रजनीश हेमन्त ।

घर में सालो छायल वसन्त ।।

आई आई टियन दुनों बेटा ।

अजबे सीधा आउ सपेटा ।।

जहाँ बोलाबS ऊ उपलब्ध ।

बोली में चुअ हे मध ।।

गुरुभक्ति तो अपरम्पार ।

माय-बाप से ओतने प्यार ।।

केतना करियो आउ बखान ।

स्वस्थ सुखी रखथी भगवान ।।

समय के जे लेलक पहचान ।

शिक्षा पर जे देलक ध्यान ।।

ओहे सब आगे बढ़ गेल ।

आज उँचाई पर चढ़ गेल ।।

हम तो लेखक बने न पइली ।

मगही में ई कविता कइली ।।

कइसन लगलो ई न जानी ।

बाकी हे ई सच कहानी ।।

कवि चितरंजन 'चैनपुरा' , जहानाबाद, बिहार, 804425

दिव्य रश्मि केवल समाचार पोर्टल ही नहीं समाज का दर्पण है |