साहित्यिक भगवान

साहित्यिक भगवान

मार्कण्डेय शारदेय

भइया! कविता लिखत-लिखत मरि जइबs ना तू इज्जति पइबs।

लाख बनs तू उच्च कोटि के बिन रुपया के पूजल जइबs?

रुपया खूब कमा खरीद लs दस-पनरह साहित्यकार के।

अपने पs साहित्य रचावs टीका ले लs कर्णधार के।

पुरस्कार सम्मान-योजना पइसे पs बा चलs दिया दीं।

बड़का-बड़का उपाधियन से कुल्हि कुकरनी चलs मिटा दीं।

खिखटी लेखा हो जइबs साहित्य-तपस्या में तप-तप के।

धोबी के कूकुर बनि जइबs कविता के माला जप- जप के।

बाबू डाँटसु, माई बोले, हित आ मीत मजाक उड़ावसु।

मिरकुचनी मेहरारू- लइका फक्कड़पन पs लोर बहावसु।

आवs पहिले नोट कमा लs तोन फुला लs दिहs दलाली।

मोट-मोट अक्षर में खाली अपने के पइबs तू हाली।

टकाकाल हs टका बिना साहित्य-शिरोमणि ना बन पइबs।

मानs बाति मंच-मंच पs आपन कीर्ति-ध्वजा लहरइबs।

भरs बेग में नोट चलs के ना दी तहरा के सम्मान?

साहित्य-भूमि के भार उतारे तू आइल बाड़s भगवान्!*

हमारे खबरों को शेयर करना न भूलें| हमारे यूटूब चैनल से अवश्य जुड़ें https://www.youtube.com/divyarashminews https://www.facebook.com/divyarashmimag