पितराही लोटा

          ---:भारतका एक ब्राह्मण.

            संजय कुमार मिश्र'अणु'

----------------------------------------

      कमर में धोती।कपार पर लम्हर नगफणी टीका।गला में ,बांह पर आऊ दहिना हाथ में गोमुखी माला।उपरे से धोती ओढले ई हथ घमंडी बाबा।इनकर चर्चा बडी आम हे।रहन-सहन एकदम पवित्तर।जने भी जयतन कोई के कोई समान न लेतन।न अपन समान कोई के छुवे देतन।ओढना बिछवना सब साथे संगे-संगे एगो बडी वजनदार पितराही लोटा।

              ई लोटवा में उनकर परान बसल हे।कभी कोई  जे उनकर समान छु देल तो उ सबके फिच-फांच देतन।लोटा जब छुवा जा हे तब कह मत।सबसे पहिले लोटवा में आग डालके खुब तपावल जा हे।एकर बाद आधा पहर तक खुब गाय के गोबर आऊ गोरकी मट्टी से मला हे।तब जाके ओकरा पर गंगा छिडकल जा हे तब कहीं पवितर होव हे बाबा के जलपान करे लाईक।बाबा कभी चापाकल के पानी न पीय हलन।उनका खातिर बस कुआं के पानी ठीक हल।बाकी सब बेकार।

           एक दिन के घटना हे की घमंडी बाबा के बड लडिका परमेस्सर के शादी हल।शादी में बरात गांव में पहुंचल।साम के समय हल।डोल-डाल जाय के बेरा।घमंडी बाबा रोज साम के डोल-डाल जाय के पहिले भांग के  गोला मार हलन।सराती वलन से कहलन की हमरा तनी कुआं देखा दs पानी के जरूरी हे।दुखन उनका ले के देवीथान गेल आऊ कुआं देल।बाबा अपन पितराही लोटा के गर्दन धोती से बन्हलन आऊ कुआं में डुबवलन।पानी निकाल के पहिले भांग मारलन।फिर जे जलपान करेला जे मिलल रहे उहईं बईठ के लगलन सफाचट करे।जलपान कर के चललन अब फिर पानी निकाले।ई लs अबकी बार तो धोतिया खिचा  गेल लोटवा उहईं डूबकी ले लेल।भांग के नशा बढ रहल हल।लगलन हल्ला करे।अरे...... तनी दउड रे!लोटवा डूब गेल।हमर लोटवा डूब गेल।

           बराती सराती के लोग दउडलन।हाल पता चलल।सराती वलन कहलन..... घबराईं मत हम घरे से पितराही लोटा मंगवा दे ही।तब ले ओकरा से काम चलाईं।सबेरे देखल जायेत।पर बाबा न मनलन।

        रात के समय हल।ई कुआं में कोई उतरे ला तईयार न हल।कुआं गहरा हल आऊ बडा भी।सबकोई समझा के थक गेल।लेकिन घमंडी बाबा अपन घमंड में चुर।घोषणा कर देलन..... जबतक हमर पितराही लोटा न मिलत हम डोल-डाल न जायेब।अब ऐकर का हिसाब हे।बात उनकर समधी के पता चलल।खुब समझयलन लेकिन सब बेकार।थक हार के बडी हिम्मत कर के एगो आदमी कुआं में उतरल आऊ बाबा के लोटा भेटायेल।तब बाबा गेलन डोल-डाल गेलन।

----------------------------------------

वलिदाद,अरवल(बिहार)

हमारे खबरों को शेयर करना न भूलें| हमारे यूटूब चैनल से अवश्य जुड़ें https://www.youtube.com/divyarashminews https://www.facebook.com/divyarashmimag