अयलउ आंधी घेरकउ बदरिया ।(मगही कविता)

अयलउ आंधी घेरकउ बदरिया ।

अयलउ आंधी घेरकउ बदरिया ।

ये ओम ! आम चुने चलिहें चन्धरिया ।।

भइबा-बहिनी एक्के साथ ।

रहिहें दुनों जोड़यले हाथ ।।

पीछे-पीछे बाबा-मामा 

लेले बट्टा-मउनी माथ ।।

दउड़ल अयतउ बाप-मतरिया ।

ये ओम आम चुने चलिहें चन्धरिया ।।

बादल गरजउ बिजुली चमकउ 

तइयो न तू तनिको डरिहें !

सुझतउ न जो गिरलका अम्मा 

टॉर्च मोबाईल साथे रखिहें !

घुचघुच करिया रात अन्धरिया ।

ये ओम ! आम चुने चलिहें चन्धरिया ।।

डाली टुट के परल पटउर ।

भर गेलउ सब टाँड़ अउ छउर ।

बल्ला पर से बिगहा पर तक 

अहरा झरहा आउ घोड़दउर ।।

लइकन सब दउड़ित धन्धरिया ।

 ये ओम ! आम चुने चलिहें चन्धरिया !

गउआँ पर घनघोर बगइचा ।

उहाँ लेहें मोल आउ पइंचा ।।

इहाँ खेत में बूनल सगरो 

मोरी मकइ सनइ आउ ढइंचा ।।

कइसन हें तू सोनभदरिया ?

ये ओम ! आम चुने चलिहें चन्धरिया ।

तू चल गेलें पुरनियाँ टाउन ।

इहाँ लगल हउ लौको डाउन ।।

तू तो अयलें आम न चुने 

चुन लेलकउ सब नउआ नाउन ।।

चल गेलउ चितचैन बधरिया ।

ये ओम ! आम चुने चलिहें चन्धरिया ।।

कवि चितरंजन 'चैनपुरा' , जहानाबाद, बिहार, 

दिव्य रश्मि केवल समाचार पोर्टल ही नहीं समाज का दर्पण है |